آج کل پاکستان میں وائٹننگ انجیکشنز کا کافی زور ہے، اور جب سے اداکاروں نے اسے لگانا شروع کیا ہے تب سے تو ہر بندہ ہی اس کے بارے میں جان گیا ہے۔ لیکن چونکہ یہ ٹریٹمنٹ مہنگا ہوتا ہے اسلیئے ہر کوئی اسے نہیں کروا سکتا، پر جو خواتین کرواتی ہیں یا پھر کروانا چاہتی ہیں یہ آرٹیکل انکے لیئے ہے۔
اس آرٹیکل میں آپ کو بتایا جائے گا کہ اسکن وائیٹننگ انجیکشنز بنتے کس طرح ہیں اور کیا وہ واقعی ہمارے لئے نقصان دہ ہیں؟ اس کے علاوہ کچھ ایسی غذاؤں کے بارے میں بتایا جائے گا جن سے جلد قدرتی طور پر نکھر جاتی ہے۔
وائٹننگ انجیکشن کیا ہوتے ہیں؟
اسکن وائیٹننگ انجیکشنز دراصل گلوٹاتھیون کی خوراک پر مشتمل ہوتے ہیں۔ گلوٹاتھیون ایک ایسا جز ہے جو ہمارے جسم میں ہمارا جگر خود بناتا ہے اور یہ قدرتی انزائم ہمارے جسم میں بہت سے فرائض انجام دیتا ہے جیسے کہ جسم کے ٹشوز کی تعمیر اور خراب ٹشوز کو بہتر بنانا، عمر رسیدگی کے اثرات کم کرنا، قوت مدافعت بہتر کرنا اور یہاں تک کہ کینسر کے خطرات سے بھی لڑتا ہے۔ بڑھتی عمر کے ساتھ ساتھ جگر گلوٹاتھیون بنانا کم کردیتا ہے جس کی وجہ سے جلد پر جھائیاں اور جھریاں وغیرہ پڑ جاتی ہیں۔ ایسے میں گلوٹاتھیون کے انجیکشنز لینے سے جلد دوبارہ جوان، خوبصورت ہوجاتی ہے۔ جہاں تک رنگ گورا کرنے کا تعلق ہے اس کا جواب یہ ہے کہ گلوٹاتھیون جلد میں رنگ پیدا کرنے والے انزائم "میلانن" کی مقدار کو کم سے کم کرتا ہے جس سے رنگ گوری ہوجاتا ہےالبتہ میلانن جلد کو سورج کی شعاعوں سے محفوظ رکھنے میں مدد کرتا ہے۔
کیا یہ انجیکشن نقصان دہ ہیں؟
سوال یہ پیدا ہوتا ہے کہ جسم میں قدرتی طور پر پیدا ہونے والے انزائم کو اگر انجیکشن کی صورت لیا جائے تو اس سے نقصان کیوں ہوتا ہے؟ اس سوال کا جواب یہ ہے کہ ان گلوٹاتھیون انجیکشنز کی ڈوز اگر زیادہ لی جائے تو اس سے معمولی نقصانات سے لے کر شدید نقصانات بھی ہوسکتے ہیں جس کی وجہ جسم میں پہلے سے موجود ہونے والی بیماریاں اور گلوٹاتھیون کی مقدار بڑھ جانا ہوتا ہے۔ اس سے ہونے والے سائیڈ ایفیکٹ میں ڈائریا، اسکن الرجی، خارش، سانس لینے میں دشواری اور وزن بڑھنے سے لے کر گردے فیل ہونا اور خون میں زہریلا پن پیدا ہونا بھی شامل ہے۔
انجیکشن کے بجائے متبادل غذائیں استعمال کریں:
مضر اثرات کے علاوہ یہ انجکیشنز تھوڑے عرصے کے لئے فائدہ مند ہوتے ہیں اور کچھ عرصے بعد اثر کھونے لگتے ہیں۔ اس لئے بجائے مصنوئی طریقہ کار اختیار کرنے کے ڈاکٹرز گلوٹاتھیون بڑھانے کے قدرتی ذرایع بڑھانے کا مشورہ دیتے ہیں جس کے لئے ایسی غذائیں استعمال کرنا ضروری ہیں جو اس کو بڑھانے میں مدد کریں۔ گوبھی، بند گوبھی، ہرے پتیوں والی سبزیاں، آلو، کالی مرچ، پالک، خربوزہ، تربوز اور خشک میوہ جات خاص طور پر اخروٹ میں گلوٹاتھیون پیدا کرنے کی صلاحیت موجود ہے۔
